Mandaue hayan makalabay sa Binaliw

CEBU, Philippines – Hayan tugotan sa kagamhanan sa Siyudad sa Sugbo nga makalabay sa basura ang Dakbayan sa Mandaue sa pribadong landfill sa Binaliw.

Kini ang gipadayag ni Cebu City Mayor Edgardo Labella human nasayud sa tinguha ni Mandaue City Mayor Jonas Cortes bisan wala pa siya pormal nakadawat sa hangyo.

Una nang gidid-an sa mayor ang ubang lugar sa paglabay sa ilang basura sa Binaliw nga gipanag-iya sa ARN Central Waste Management, Inc.

Apan si Cortes nagkanayon nga hunahunaon usab ni Labella ang pagkonsiderar nga palabayon sila sa Binaliw tungod ang mga landfill sa Consolacion ug Aloguinsan gipasirado na. Si Labella gisaway sa pipila ka konsehal sa siyudad sa pagpahunong sa ubang lugar sa paglabay sa basura sa Binaliw.

Samtang sa Dakbayan sa Lapu-Lapu, higpit karon nga gipahimangnoan ni Mayor Junard “Ahong” Chan ang tanang barangay kapitan sa dakbayan sa paghipos sa ilang mga basura sulod sa 24 oras aron dili mag-atubang og kaso.

Gimanduan ni Chan ang Solid Waste Management sa City Environment and Natural Resources Office (CENRO) uban Environmental and Sanitation Committee sa paghimo og pakisusi sa pag-ila sa mga barangay nga pakyas sa pagkolekta sa ilang basura.

Matud ni Chan nga ang siyudad mopahamtang og multa nga P500 hangtud sa P1,500 sa kalapasan sa garbage segregation ordinance. (Romeo T. Limpangog/GMR)(BANAT NEWS)