CEBU, Philippines – Ipatuman na karong Huwebes, Agosto 1 ang pagpatuman sa ordinansahon sa Barangay Poblacion, Dakbayan sa Talisay labot sa kahapsay ug kahamugaway sa pagpuyo.
Ang Poblacion maoy napili sa kapolisan sa siyudad nga maoy himuong pilot barangay sa discipline zone.
Ipatuman sa mga polis inabagan sa mga barangay tanod ang curfew sa mga menor de edad, pagdili sa paginom-inom sa pampublikong lugar, pagvideoke nga lapas sa alas 10 sa gabii, pagpataka og labay sa basura, pagparking sa dili designated area ug uban pa.
Kini maoy usa sa mga programa ni Police Colonel Roderick Mariano, direktor sa Cebu Provincial Police Office nga ang matag police station sa mga local government units moila og lugar nga himuong discipline zone.
Ang Talisay City Police nga gipangulohan ni Police Major Orlando Carag Jr. nakig-alayon na aron ipahibawo sa tanan nga sugdan ang pagpatuman sa maong program karong Huwebes.
Ang molapas niining balaud, mahimong masita o masilotan subay sa nakalatid sa ordinansa.
Nanghinaut karon si Kapitan Edward Alesna nga unta tumanon sa taga Poblacion ang mga lagda aron magpuyo nga hapsay ug malinawon. (/DILT)(BANAT NEWS)