Medyas, long sleeved batok dengue
CEBU, Philippines — Gidasig sa kagamhanan sa Dakbayan sa Mandaue ang kabataan nga nagtungha sa day care centers ug mga primary schools nga magsul-ob og taas nga medyas ug taas og bukton nga senina isip panagang batok sa dengue.
Ang konseho sa siyudad bag-ohay lang nipasar og resolusyon nga gipangamhanan ni Konsehal Jimmy Lumapas nga nag-awhag sa mga day care centers ug primary school institutions sa pagdasig sa mga tinun-an nga mo-obserbar og proper sanitation batok sa dengue.
Lakip sa mga sugyot ang pagpasul-ob og medyas hangtud sa tuhod ug long sleeved nga senina kung motungha sa klase.
Ang Department of Health una na nga nideklarar og national dengue alert tungod sa paspas nga pagsaka sa mga kaso sa lainlaing rehiyon.
Ang Central Visayas usa sa giila nga dunay daghang kaso nga nilapas na sa epidemic threshold tungod kay niabot na sa 9,199 kaso gikan sa Enero hangtud Hunyo 2019.
Matud ni Lumapas nga ang kabataan ang sagad gyud nga dali mapaakan og lamok maong angayan lang nga mohimo og mga lakang nga malikayan ang sakit nga dengue.
“Whereas, to instill proper sanitation and the wearing of these self-protective garments to schoolchildren are hereby enjoined by Mandaue City Government, to form part of its intensified campaign to prevent the rapid rise of dengue cases,” pagbasa sa bahin sa resolusyon ni Lumapas.
Ang buhatan ni Mayor Jonas Cortes, mga day care centers sa 27 ka barangay sa Dakbayan sa Mandaue ug Department of Education Mandaue City Division ang hatagan sa kopya sa maong resolusyon alang sa daling aksyon. (BANATNEWS)
- Latest
