CEBU, Philippines — Gisunog ang duha ka Small Town Lottery (STL) outlets sa Barangay Macaas, Lungsod sa Catmon niadtong Biyernes sa kaadlawon.
Ang pagsunog nahitabo pipila ka oras sa wala pa nimando si Presidente Rodrigo Duterte sa pagpasira sa tanang lotto outlets lukop nasud nunot sa giingong grabeng korupsiyon sa Philippine Charity Sweepstakes Office (PCSO).
Ang duha ka lotto outlets nahimutang daplin sa karsada diin pipila lang ka metros ang distansya.
Sa imbestigasyon sa kapolisan nasuta nga ang duha ka outlets gibuboan og gasolina dayun gisilaban.
Si Police Master Sergeant Junrey Frias, chief investigator sa Catmon Police Station, niresponde sa maong lugar ug nagpahigayon og pasiunang pakisusi.
“Naa may witness nga niagi anang mga orasa kuno, kakita siya nga nagdilaab na mao nga nihunong siya ug nanawag sa mga tawo nga namuyo duol, ilang gitabangan sa pagpatay ang kayo, ilang gibuboan og tubig,” sigun pa ni Frias.
Base sa imbestigasyon sa kapolisan, aduna silay duda sa panghitabo.
“Di ba nag-pronounce si Presidente Duterte nga ipadakop ang tanan nga mga ingon ana nga mga STL, ang among nahibudngan ngano man nga pag-pronounce ra, naa may sunog nga nahitabo.
Actually pagka-ugma ang among interpretation sa among investigation murag makaduda ba nga ang duha ka complainants nagdungan man og report ngadto,” matud pa ni Frias.
“Naa mi doubt ani,” dugang pa niya.
Sa pagkakaron ang maong insidente gipaubos pa sa imbestigasyon. (/GMR)(BANATNEWS)