839 ka trabahante sa Kapitolyo ipa-outsource
CEBU, Philippines – Mokabat sa 839 ka empleyado ang i-outsource sa Kapitolyo alang sa 16 ka provincial ug district hospitals sa Lalawigan sa Sugbo ug ubang buhatan kinsa 443 niini ang medical personnel ug 396 ang non-medical personnel.
Matud ni Bernard Calderon, officer-in-charge sa Provincial General Services Office (PGSO) ug sakop sa Bids and Awards Committee sa Kapitolyo, nga duha ka service providers ang kuhaon sa Kapitolyo alang sa medical personnel ug sa ubang opisina.
Sa mga medical personnel, unom ang medical specialist, 108 ang medical officer III, 25 ka medical technologist, 120 ka nurse 1 ug 83 ka nursing attendants.
Apil sab nga i-outsource ang duha ka nutritionist-dietitian 1, 13 ka pharmacists, 18 ka midwife, siyam ka medical equipment technician, 18 ka medical laboratory technician I, 32 ka laboratory aide II ug siyam ka dental aide I.
Sa mga non-medical personnel, pipila sa i-outsource sa Kapitolyo ang siyam ka engineer II, 13 ka engineer I, 44 ka agricultural technologist, 36 ka prison guard I, 48 ka clerk, 27 ka driver, ug 13 ka sanitation inspector ug 84 ka ug utility worker.
Moabot sa P91,391,964.96 ang approved budget for the contract (ABC) alang sa mga non-medical personnel samtang P186,288,506.40 usab sa mga medical staff ug sa kinatibuk-an moabot sa P277,680,471.36 ang ABC alang sa pag-outsource sa usa ka tuig nga kontrata.
Matud ni Calderon nga pinaagi sa outsourcing mamahimo ra nga makadugang og personnel ang probinsiya gikan sa kuhaon nga ahensya.
“Mao na nakanindot sa outsource, pwede nato kuhaan, pewde nato dugangan depende sa needed nga tawo,” matud ni Calderon. Matud niya nga kun makapili na og service provider ang Kapitolyo, wagtangon na ang tanang job order ug contract of service nga empleyado sa Kapitolyo sanglit ang gikan sa service provider naman maoy ipuno sa mga regular nga mga empleyaod ngadto sa nagkadaiyang buhatan.
Ang pre-bid conference sa pagpangita og service provider ipahigayon karong Lunes, Hulyo 29 samtang ang bidding gikatakda sa Agosto 13. (/GMR)(BANAT NEWS)
- Latest
