7 enforcers sa Talisay gitaktak
CEBU, Philippines – Pito ka sakop sa City of Talisay-Traffic Operation Development Authority (CT-TODA) ang gipangtaktak human nahibaw-an nga tiggamitan og ilegal nga drugas.
Matud ni Mayor Gerald Anthony “Samsam” Gullas Jr. nga dili siya modupa sa mga kawani nga mogamit og ginadiling drugas.
Hinoon si Gullas nimando ngadto ni Jonathan “Joy” Tumulak, traffic czar sa siyudad, nga ipaubos ang pito ka enforcer sa aftercare program aron magiyahan kun unsaon pag-undang o paglikay sa maong bisyo.
Tulo ka buwan ang pagpa-rehab sa pito ka enforcer ug mahimo ra silang dawaton sa mayor kun limpyo na gyud sila sa ilegal nga drugas.
Ang 135 ka sakop sa CT-TODA ang gipaubos sa surprise drug test niadtong Lunes kinsa pito ang nagpositibo.
Adunay niangkon apan ang uban nirason nga dugay na sila nga nibiya sa maong bisyo.
Matud ni Tumulak nga wala na kinahanglana ang confirmatory test tungod kay dili man regular nga kawani ang pito ka sakop sa CT-TODA. Mensahe sa mayor sa ubang kawani nga dili gyud sila magpabadlong. (/GMR)(BANAT NEWS)
- Latest
