Problema sa basura gituki sa opisyales sa Cebu City

CEBU, Philippines – Nakig-meeting si Cebu City Mayor Edgardo Labella sa mga barangay kapitan ug ubang ahensiya sa gobiyerno lakip sa pribadong sektor aron pagtuki sa mga nagkalainlaing problema sama sa garbage collection, disposal, paglimpiyo sa waterways ug uban pa.

Buot ni Labella nga magkahiusa silang tanan ilabi na ang kabarangayan sa pagtuman sa mando ni Presidente Rodrigo Duterte ngadto sa Local Government Units sa pagprotekta sa kalikupan.

Matud ni Labella nga ipadaplin una ang politika ug motrabaho una aron kahatagan og kasulbaran ang problema sa Siyudad sa Sugbo. Ang presidente sa nasud nibahad kini nga dili magpanuko sa pagpahamtang og silot sa mga walay gibuhat pagtuman sa iyang mando.

Usa sa hatagan nila og pagtagad ang paglimpiyo sa waterways diin magsugod sila sa Guadalupe River tungod kay nasuta nga kini ang adunay seryosong problema sa basura.

Gitahasan usab ni Labella ang mga barangay mahitungod sa pagkolekta ug saktong paglabay sa basura aron dili kini maadto sa kasapaan.

Si Labella nimando kang Grace Luardo, pangulo sa Cebu City Environmental Sanitation Enforcement Team sa pagdakop sa mga magpataka og labay sa ilang basura.

Subay niini, ang presidente sa Association of Barangay Councils (ABC) Cebu City Chapter ug Kasambagan Barangay Captain Franklyn Ong nagkanayon nga ang kabarangayan adunay responsibilidad nga motabang og kuha sa basura apan magkinahanglan usab sila og tabang sa siyudad.

Sa ulahing inventory ni Ong adunay 60 ngadto sa 65 ka barangay sa siyudad ang dunay garbage trucks.

“Of course, ang barangay karon even in fact akong barangay nag-augment ta, nangita gyud ta og pamaagi, nagpatabang gyud ta og private companies nga makatabang og hakot sa atong basura”, matud ni Ong. (/BDB)(BANAT NEWS)