CEBU, Philippines – Maglusad ang Dakbayan sa Sugbo og one-day processing sa business permit sugod sunod buwan kun tanang requirements makompleto.
Si Mayor Edgardo Labella nagkanayon nga nakadawat siya og ubay-ubay nga reklamo gikan sa mga negosyante kalabot sa kalangan sa pagpagawas sa business permits nga giingong makapugong sa pagpasulod og negosyo sa siyudad.
“For as long as it will be proven that it will not be fly-by-night businesses, we have to issue the business permit. If it will be business-friendly, we will have more business coming,” sigun sa mayor. Matud ni City Administrator Floro Casas, Jr. nga ang mga hingtungdang buhatan ang nagsusi karon sa mga requirements sa pag-isyu sa business permit.
Usa sa makalangay sa paghatag sa business permit mao ang sanitary permit ug fire certificate.
Nunot niini gimando sa mayor nga ipauwahi lang ang sanitary permit ug fire certificate samtang ang tag-iya mopirma nga makuha kini sulod sa duha ka buwan.
Apan kung dili matuman, si Casas niingon nga ang siyudad adunay katungod sa pagbawi sa permit.
Gipasabot ni Casas nga gikinahanglan lang sa pagkuha sa business permit mao ang application, rehistro sa Bureau of Internal Revenue ug Securities and Exchange Commission nga magmatuod sa pagbayad sa mga buhis, clearance sa barangay, ug uban pa. Nagtuo si Labella nga wala’y legal nga babag sa maong one-day processing bisan og wala ang nahisgutang duha ka requirements. (/GMR)(BANAT NEWS)