Trapik sa Mandaue sulbaron ni Jonas
CEBU, Philippines – Gihan-ay ni Mandaue City Mayor Jonas Cortes ang iyang mga plano sa pagsulbad sa problema sa trapiko sa siyudad niining bag-o niyang administrasyon.
Sa niaging tulo ka tuig isip kongresista sa ikaunom nga distrito sa Lalawigan sa Sugbo, si Cortes nakig-alayon sa Department of Public Works and Highways sa pagpatuman sa balor P6 bilyones nga proyekto sa tibuok distrito.
Kini naglakip sa UN Avenue Underpass, Ouano Avenue Concreting ug ang Drainage ug Road Construction sa Mantawi Drive ug uban pa gipahaum sa paglambo sa siyudad.
Matud ni Cortes nga sa wala pa siya nibalik sa pagka-mayor, giahibawo siya sa taga Japan International Cooperation Agency (JICA) sa gipanday nga Urban Transport Masterplan for Metro Cebu.
Nalakip niini ang Mandaue Coastal Road Viaduct nga dunay unom ka kilometro ang gitas-on ug ang Mandaue-Lapu-Lapu Link Bridge isip ika-upat nga taytayan nga magdugtong sa Mandaue ug Lapu-Lapu ug magsilbi sab nga multimodal bridge sa umaabot nga Urban Mass Rapid Transit (UMRT) Coastal Line gikan sa airport ug Metro Cebu.
Matud ni Cortes nga gikinahanglan ang comprehensive approach sa pagsulbad sa problema sa trapiko ug ang pagtinabangay sa mga kasikbit nga lungsod ug siyudad sa Metro Cebu.
Gitun-an na sab ang pag-usab sa mga eskina sa U.N. Avenue – M.C. Briones Street (Pacific Mall); M.C. Briones – A.S. Fortuna Street (Hi-way Seno); H. Cortes St.– A.S. Fortuna St., ug A.C. Cortes Avenue – D.M. Cortes (formerly Plaridel) St. ug P. Suico – Cebu North Road.
Gihangyo sab ni Cortes ang konseho sa siyudad sa pagpasar og mga ordinansa nga makatabang sa pagpaluag sa mga sakyanan nga dili sab maalaot ang mga drayber ug mga operators. (Beverly I. Manla/GMR)(BANAT NEWS)
- Latest
