CEBU, Philippines – Nalandig sa tambalanan ang usa ka 51- anyos nga ginang human kini gitigbas sa iyang bana diha sa liog tungod sa selos. Nahitabo kini sa Sitio Balangaw, Barangay Cambagte, Ginatilan, Probinsya sa Sugbo niadtong Lunes sa gabii.
Base sa inisyal nga pakisusi sa imbestigador sa maong kaso nga si Police Chief Master Sergeant Arnold Omaña gihukaran og panihapon sa asawa ang iyang bana dihang kalit kining gipasanginlan sa 50-anyos niining bana nga duna kini kabit nga engineer sa Dakbayan sa Sugbo. Sa tunga-tunga sa ilang lalis mikuha og putol nga sundang ang suspek, tungod sa kahadlok nikaratil og dagan ang biktima apan gigukod kini hangtud nga nasabod sa hose sa tubig ang biktima ug naabtan.
Dihadiha gitigbas sa suspek ang biktima apan nanagang kini gamit ang mga bukton ug kamot hangtud nga naigo kini sa liog. Swerteng daling niabot ang usa sa ilang mga anak ug mipatunga kanila.
Ang suspek nakombinsir sa ilang anak nga ilabay ang sundang samtang ang biktima nidagan palayo ug nangayo og tabang sa mga silingan ug kabanay ug gidala sa tambalanan.
Ang suspek gidakop sa kapolisan ug gikatakdang pasakaan og kaso. Ang mga anak sa biktima mihimakak sa mga pasangil sa ilang amahan ngadto sa ilang inahan kay matud pa wala kini kamatuoran. (/IBM)(BANAT NEWS)