CEBU, Philippines – Nalandig sa tambalanan ang usa ka lalaki human siya gipana sa iyang maguwang nga mananagat kinsa iyang nakalalis niadtong Miyerkules sa gabii diha sa Sitio Ambakon Calaboon sa Lungsod sa Dumanjug.
Ang biktima giila nga si Juan Junas Freda samtang ang suspetsado mao ang iyang igsuon nga si Rene Freda, 45, usa ka mananagat nga nagpuyo ra sab sa maong dapit.
Matud pa sa kapulisan nga niresponde sa maong insidente nga sila P/Sgt. Renante Carbona ug P/Cpl. Al-jay Alviola samtang nagpakaon sa mga baka ang biktima kalit lang kining gipana sa suspek gamit ang pana sa isda ug naigo sa kilid nga bahin sa lawas. Gidala sa tambalanan ang biktima.
Sa wala pa nahitabo ang insidente giingong naglalis ang managsuon tungod kay gibunalan ang ilang pagumangkon sa biktima. Tungod hubog ang suspek nakulatahan kini sa biktima.
Hinuon, human magkasinabot ang ilang pamilya, gipagawas ra sa kapolisan ang suspek samtang pabilin pa sa tambalanan ang biktima. (Jenny Luz R. Tejas/IBM)(BANAT NEWS)