Duha ka kaso sa pagpanglugos gisusi sa CCPO-WCPD
CEBU, Philippines – Giimbestigar sa kapolisan kining kaso sa pagpanglugos sa usa ka Grade 11 nga tinun-an niadtong nakalabay nga gabii sa Barangay Sirao sa Dakbayan sa Sugbo.
Matud pa ni Police Corporal Maryjoy Daligdig sa Talamban Police Station misumbong ang 17-anyos sa iyang ginikanan nga siya gilugos sa 24-anyos nga si Michael Barnido.
Ang kapulisan daling gipangita ang suspek ug nadakpan kini dayon paglabay sa pipila ka oras. Apan ang suspek nangangkon nga managuyab sila duha.
Gipaubos na sa medical examination kagahapon sa buntag ang dalagita samtang giandam na ang kasong rape batok sa suspek.
Sa laing kaso sa pagpanglugos, nigawas na ang resulta sa medical examination sa usa ka 19-anyos nga tinun-an sa kolehiyo nga nireklamong siya gidagit ug gilugos niadtong Hulyo 10 diha sa dalan Governor Cuenco, Barangay Banilad Cebu City.
Ang maong dalaga kinsa gikuyogan sa inahan niadtong Hulyo 12 diha sa Women’s and Children’s Protection Desk sa Mabolo Police Station aron magpa-blotter gipaubos og medical examination pagka Hulyo 13.
Si Police Staff Sergeant Jade Omayao miingon nga ang mga doctor ra gyud ang maka-interpret sa resulta sa eksaminasyon.
Giangkon ni Omayao nga naglisud sila sa pagberipika sa insidente tungod kay ang CCTV cameras sa Barangay Banilad diha sa nahitaboan diin kini gidagit wala mogana. (/IBM)(BANAT NEWS)
- Latest
