CEBU, Philippines – Ang officer-in-charge sa Mandaue City Police Office (MCPO) Police Colonel Jonathan Abella nipadayag sa iyang mga plano diin usa niini mao ang police visibility.
Matud ni Abella nga dunay ipakatap nga polis ilabi na diha sa mga lugar nga taas ang krimen nga nahitabo.
Giingong 90 porsyento sa kapolisan sa siyudad ang ipadala diha sa lainlaing outpost aron mapalapdan ang seguridad sa katawhan.
Gilauman nga sa mao unyang implementasyon mokunhod ang mga insidente sa krimen sa siyudad.
Samtang kabahin sa mga mando ni Presidente Rodrigo Duterte padayon nga tutokan sa kapolisan sa Dakbayan sa Mandaue pagsumpo sa ilegal nga drugas.
Gibutyag ni Abella nga sa dili pa sila mopahigayon og community activities ipaubos una sa internal cleansing ang kapolisan sa siyudad.
Hugot usab nga ipatuman ni Abella ang standard nga requirement sa pagsul-ob sa uniporme ug head gear sa kapolisan.
Samtang kabahin sa problema sa trapiko sa siyudad makig-coordinate sila niini sa Mandaue Traffic Division aron mapangitaan og solusyon ang maong problema. (BANAT NEWS)