Ehersisyo sa ‘Dancing Cop’
CEBU, Philippines — Giisip sa giilang dancing cop sa Cebu City Police Office nga paugnat sa kusog ang iyang paglabyog-labyog sa lawas isip traffic police sa dalan Colon.
Si Police Corporal Ronilo Ortega Dignos nasigpatan nga nakapangisi sa mga drivers gumikan sa iyang pagsayaw-sayaw samtang nagmando sa trapiko sa mga oras sa rush hour.
Nahitabo kini kagahapon human gilusad sa Cebu City Traffic Patrol Group ang ilang bag-ong istratehiya nga mahapsay ang trapiko sa kadalanan ilabi na sa downtown area.
Ang video ni Dignos nabutang sa social media page sa CCPO nga “Itug-An Ni CD” ug karon aduna nay kapin 10,000 views.
“Paugnat sa kusog, malingaw ka man sa traffic kay naa driver sa motor and taxi mo-abiba,” sigun pa niya. Sigun pa ni Dignos nga gimanduan lang sab sila ni Police Major Allan Rosario, ang hepe sa TPG.
Matud sa director sa CCPO, Police Colonel Gemma Vinluan, nga girekomendar niya ang tahas sa maong polis tungod kay mas mapaduol ang polis sa komunidad.
Gihatagan ni Vinluan si Dignos og incentive aron makapalit siya og iyang kaugalingong music player tungod kay wala ni siyay music dihang una nga nisayaw.
Ang dancing cop makit-an alas 8 sa buntag ug alas 5 sa hapon. (GMR) (BANAT NEWS)
- Latest
