Unom ka kawani sa LTO, 2 fixers nasikop

CEBU, Philippines — Unom ka mga sakop sa Land Transportation Office ug duha ka “fixers” ang gidakop sa mga sakop sa National Bureau of Investigation (NBI-7) atol sa gihimo niini nga entrapment operation niadtong Biyernes sa hapon.

Ang maong operasyon gihimo tungod sa reklamo ni Romeo Vera ang Executive Director sa LTO Quezon City ug ni LTO-7 Director Victor Caindec ngadto sa NBI Central Office ug gipasa sa NBI Central Visayas.

Ang reklamo may labot sa drivers license nga “ipakuot” aron mapadali ang pagproseso ug pag-release niini.

Ang mga nadakpan mao sila si  Marilyn Erederos, Jonathan Magudatu,  Epifanio Callino Jr.,  Charish Mae Cabigon, nga puro administrative aide sa LTO.

Apil usab nga gidakop sila si Gladys Barrio Mender ug Dembert Aldanese Dasig nga mga empleyado sab sa maong buhatan.

Samtang ang mga fixers giila nga sila si Fredlyn Velasco de Lara taga Andres Abellana Ext., Guadalupe, Cebu City ug Dexter Arriesgado Capendit nga taga Barangay Looc, Mandaue.

Matud ni Atty. Dominador Cimafranca ang assistant regional director sa NBI-7 nga giingong mangayo og P7,500 ang mga suspek kada aplikante nga gustong makakuha og driver’s license sa LTO sa paspas nga paagi.

Aron pagsikop sa grupo, aduna silay gipa- apply nga kunohay mo-renew sa ilang driver’s license.

“We found out ang ilang modus they would require the payment of P7,500 sa mga aplikante pasabot kay mo go to the process na ka ang examination nimo parang formality na lang ang practical exercises nimo kung unsaon pag-drive mao ra gihapon formality lang, kuhaan ra ka og picture, naglingkod ka sa motor or auto,” matud ni Cimafranca.

Dugang ni Cimafranca nga base sa ilang nadawat nga report gikan ni Vera nga “rampant” ang maong illegal nga kalihokan sa LTO Central Visayas  hinungdan nga nihimo sila og aksyon niini.

Si Atty. Vicente Gador Jr. ang legal officer sa LTO nagkanayon nga kasagaran moabot sa P600-700 lang ang mabayran sa aplikante sa LTO kun magkuha sa driver’s license wala pa hinoon labot niini ang gasto sa drug test ug uban pa nga requirements gawas sa ilang buhatan.

Ang operasyon nahitabo kini didto sa LTO District Office sa J Center Mall sa Dakbayan sa Mandaue ug dayon sa Cebu City Licensing Center sa SM Seaside.

Kalapasan sa Anti-Red Tape Act of 2007 ug Anti-Graft and Corrupt Practices Act ang ipasaka batok sa walo nga anaa karon sa kustodiya sa NBI human sila gipaubos sa inquest proceeding sa buhatan ni Proseutor II Leah Cruz sa  Cebu City Prosecutor’s Office kagahapon. Sila nidesisyon nga  didto na sa korte nila atubangon ang kaso.

Matod ni Gador nga giabisohan na nila ang ilang mga trabahante nga nadakpan nga mangita og ilang abogado. (BANAT NEWS)