100 balay naugdaw

CEBU, Philippines — Gibanabanang kapin sa 100 ka mga panimalay ang naugdaw atol sa pag-ulbo sa sunog sa tulo ka mga sitio sa Barangay Gun-ob, Dakbayan sa Lapu-Lapu, Sabado sa gabii.

Sumala pa sa kabomberohan, ang sunog nagsugod sa panimalay ni Louie Vaflor.

Nadawat sa kabomberohan ang alarma alas 11:55 sa gabii ug daling giisa ngadto sa task force alpha tungod kay sagad sa kabalayan ginama sa light materials ug sikit-sikit kini.

Hingpit nga napawong ang sunog alas 4:25 na sa kaadlawon.

Matud pa ni Fire Officer 1 John Tepait, sa Lapulapu City Fire Station ipatawag nila si Vaflor alang sa gihimo nila karong imbestigasyon bahin sa hitabo.

Gibanabanang mokabat P500 mil ang danyos sa maong sunog nga nakaapektar og gastosan ka mga pamilya.

Wala hinooy natala o nakalas sa maong sunog nga nahimutang sa hagip-ot nga lugar.

Si Nagiel Bañacia nga maoy City’s Disaster Risk Reduction Management Officer sa  maong dakbayan miingon nga anaa gyud sa mga 120 ka mga balay ang hingpit nga naugdaw nga ginama  sa light materials.

Si Gun-ob Barangay Capatian  Ely Fontanoza miingon nga mohimo sila og special session sa konseho sa barangay alang sa pagdeklarar og state of calamity sa apektadong mga sitio aron magamit ang ilang calamity funds.

Ang mga sitio nga naigo mao ang Sebona, Jurassic ug Chokay. (Romeo T. Limpangog/IBM) (BANATNEWS)