Sikad driver gidunggab patay
CEBU, Philippines – Gidunggab patay sa iyang silingan ang usa ka traysikad driver nga gituohang nalambigit sa ilegal nga drugas sa may Kinalumsan Bridge, Mambaling, Dakbayan sa Sugbo niadtong Lunes sa kadlawon.
Giila ang nadunggaban nga si Bonifacio Pogoy Amarin, 41-anyos samtang ang nagdunggab kaniya mao ang iyang silingan nga si Arvin Balansag, 30-anyos, parehong residente sa maong dapit.
Base sa inisyal nga imbestigasyon sa kapolisan sa Police Station 11 sa Mambaling nga nakadawat sila og tawag sa usa ka concerned citizen labot sa maong insidente.
Giingong naglakaw ang biktima kauban ang iyang amigo padulong sa iyang traysikad aron mamasahero apan giatangan na siya sa suspek dayun dunggab kaniya hinungdan sa iyang pagkatumba ug dali ra sad nakaikyas ang suspek.
Ang Cebu City Emergency Medical Services personnel nga si Alvin Baylon maoy nideklarar sa biktima nga wala nay pulso ug ginhawa.
Adunay samad dinunggaban ang biktima sa walang parte sa iyang dughan nga niresulta sa diha-diha niyang kamatayon.
Ang Scene of the Crime Operatives nga gipangulohan ni Police Lieutenant Reynaldo Ramos nga nisusi sa lugar nakakuha gikan sa biktima og usa ka gamayng pakete sa gituohang shabu ug mga drug paraphernalia.
Gituohang may koneksyon sa drugas ug personal nga kasuko ang motibo sa pagpanunggab kay giingong pulos tiggamitan ang duha. (/GMR)(BANAT NEWS)
- Latest
