CEBU, Philippines — Ang Dakbayan sa Sugbo gideklarang numero nga pinakapaspas nga makasulbad og krimen sa tibuok rehiyon-7 karong tuiga base sa datos sa Police Regional Office-7.
Ang bag-ong Deputy Regional Director for Administration Police Colonel Ildebrandi Usana nagkanayon nga ilang gi-tally ang Crime Clearance Efficiency o ang gipaspason nga makasulbad og krimen sa tibuok rehiyon-7 sugod sa Enero niining tuiga. Madeklarar nga cleared na ang usa ka kaso kon napasaka na kini ngadto sa korte bisan og wala pa masikop ang suspetsado.
Sukad sa buwang sa Enero hangtud sa Hunyo karong tuiga, nag-una ang Dakbayan sa Sugbo nga adunay total index crime nga 1,261 ug 59.7% niini o 753 kabuok ang total index solved.
Ikaduha ang Dakbayan sa Mandaue, diin aduna kini total index crime nga 426 ug 250 niini ang solved ,gisundan kini sa Siquijor, Negros Orienta ug Bohol.
Nalandig sa ikaunom nga pwesto ang Probinsya sa Sugbo diin 2,328 kabuok ang total index crimes ug 895 lang ang total index solved.
Ang kinagamyan mao ang Dakbayan sa Lapu-lapu diin 283 kabuok ang total index crimes niini ug 96 lang ang solved.
Sa niaging tuig, nag-una sa kinatibuk-an ang Siquijor diin aduna kini total index crime nga 42 ug 33 kabuok ang solved.
Ikaduha mao ang Dakbayan sa Sugbo diin 71.8 % ang solved.
Ang Dakbayan sa Lapu-Lapu ulahi gihapon kini diin 43.1% lang ang total index cleared. (BANAT NEWS)