CEBU, Philippines – Si Mayor Jonas Cortes sa Dakbayan sa Mandaue nitutok sa suliran sa paglabay sa mga basura sa siyudad.
Niadtong niaging adlaw nibisita si Cortes sa Guun Corporation Limited nga usa ka waste recycling firm diha sa Sitio Sun-ok, Barangay Tayud, Lungsod sa Consolacion.
Ang Guun Corporation Limited ug ang lokal nga kagamhanan sa Dakbayan sa Mandaue adunay kasabutan kabahin sa paglabay sa mga recycle nga mga basura nga bayaran kini og P700 ang matag tonelada sa maong kompaniya.
Ang maong mga basura nga nakolekta sa nahisgutang kompaniya paliton usab kini gikan kanila sa Apo Cement Corporation og P1,800 matag tonelada niini.
Matud ni Reynaldo Romla kinsa maoy nagdumala sa proseso sa waste recycling sa maong kompaniya nga moabot ngadto sa 10 ka tonelada nga basura ang ilang madawat gikan sa Dakbayan sa Mandaue sa matag adlaw nga Martes ug Huwebes.
Si Cortes nagplano sa pag-usab sa mga oras o mga adlaw sa pagkolekta sa mga basura ug ang paghakot niini tungod kay gituohan nga usa kini sa hinungdan sa paghuot sa mga sakyanan diha sa kadalanan sa siyudad.
Gibutyag ni Cortes nga nalakip karon sa iyang plano ang paglibkas sa truck ban sa alas 8:00 sa gabii sa paghatag og higayon sa mga truck sa basura nga mahimo na nga makaagi sa kadalanan sa ilang pagpaingon sa labayanan ngadto sa Lungsod sa Consolacion. Giklaro ni Cortes nga ang maong mga lakang nga iyang pagahimuon wala usab magpasabot nga dili na molabay og basura ngadto sa Binaliw landfill diin mao kini ang labayanan sa dakbayan sa mga basura nga madunot. (/BDB)(BANAT NEWS)