Dungan ang inaugural session sa konseho sa Lapu-Lapu ug Mandaue

CEBU, Philippines – Dungan nga magpahigayon sa ilang inaugural session ang  mga bag-ong sakop sa konseho sa Dakbayan sa Lapu-Lapu nga pangulohan ni Bise Mayor Celedonio Sitoy ug Dakbayan  sa Mandaue nga pangulohan ni Bise Mayor Glenn Bercede.

Si  Bise  Mayor  Sitoy  nga unang  higayon nga moserbisyo sa mga Oponganon maoy mangulo sa 12 ka mga sakop sa konseho nga gidominar sa sakop sa Lakas-CMD sanglit duha lang ka mga konsehal ubos sa iyang partido nga PDP-Laban ang nakasulod.

Si Sangguniang Panlungsod Secretary Franco Limpangog  nga  miingon nga sa  unang sesyon nga himuon mahibaw-an usab ang pangulohan nga komite sa matag konsehal ug ingon man kon kinsa kanila ang magsilbing floor leaders.

Samtang si Bise Mayor Bercede sa Mandaue miingon nga sanglit pulos man niya kauban sa partidong PDP-Laban  ang mga sakop sa konseho, ilang gihimo ang pagbahig na daan sa pangulohan nga komite sa matag konsehal.

Nunot niini iyang gipadayag nga sa labing unang sesyon nila ilang matuki ang duha ka mga ordinansa nga iyang giisip nga top priority.

Nasayran nga susihon nila og usab ang ordinansa nga nagdili sa paggamit og mga plastic bag ug ingon man ang pagdili sa mga motorista nga magtabon sa ilang nawong sa ilang paglabay sa kadalanan sa dakbayan.

Tinguha sa bag-ong konseho nga ma-review ang maong mga ordinansa nunot sa mga reklamo mga ilang nadungog. (/DILT)(BANAT NEWS)