CEBU, Philippines – Nagpadala og sulat ang WT Construction ngadto kang Gobernador Gwendolyn Garcia pagpananghid nga ilang kuhaon ang ilang mga ekipo sa construction site nga tukoran unta sa 20-storey Resource Center.
Sa maong sulat nga gipadala pinaagi ni Danilo dela Cruz ang project coordinator sa WT Construction nipahibalo kini nga ilang kuhaon ang ilang survey instrument.
Apan sumala ni Bernard Calderon ang assistant head sa Provincial General Services Office nga wala motugot niini si Garcia.
Gimando hinuon sa gobernadora nga walay ekipo sa WT Construction ang mapagawas gikan sa site.
Sulod sa site aduna pay mga backhoes, crane ug ubang ekipo nga nahabilin.
Wala na usab gipasulod ang mga trabahante sa WT Construction ug gibantayan ang site sa mga Capitol Blue Guards. Nadawat ni Calderon ang maong sulat niadtong hapon sa Hulyo 2 apan kagahapon ra niya kini nabasa.
Una nang nipagawas si Garcia og executive order nga nagmando sa pagpahunong sa trabaho sa P1.3 bilyones nga Capitol Resource Center.
Sa pagsulat niining balita, wala pa nakuhaan og habig sa Banat News ang gobernadora kon nganong wala niya tugoti nga ipagawas ang mga ekipo. (/DILT)(BANAT NEWS)