Jonas molibot sa mga opisina

CEBU, Philippines — Sa unang adlaw sa paglingkod sa opisina karong adlawa, molibot si Mandaue City Mayor Jonas Cortes sa mga opisina ug dili na ang naandan nga siya ang bisitahon sa mga department heads ug mga kawani. Buot sutaon ni Cortes ang kahimtang sa trabaho sa mga kawani ug ingon man ang ilang mga gimbuhaton. Nunot niini walay courtesy call nga mahitabo sa buhatan sa mayor. Buot sab ni Cortes nga niining iyang bag-ong administrasyon maoy iyang himoon ang pagpaduol sa serbisyo sa kagamhanan ngadto sa mga Mandauehanons.

Si Cortes nihuman sa tulo niya ka termino isip mayor sa Dakbayan sa Mandaue sugod niadtong 2007 ug natapos niadtong 2016. Nahimo siyang kongresista sulod sa usa ka termino sa 2016 hangtud sa Hunyo 30, 2019 ug karon nibalik sa pagka-mayor. (/GMR)(BANATNEWS)