CEBU, Philippines — Nakurat ang daghang Sugbuanon niadtong Domingo sa kaadlawon human nakasinati og pagtay-og gumikan sa linog sa Limasawa Island sa Southern Leyte diin tectonic ang hinungdan.
Sa report sa Philippine Institute of Volcanoloy and Seismology, alas 3 sa kaadlawon nakatala sila og magnitude 5 nga linog sa Southern Leyte. Sentro niini ang nahisgutang lugar diin dunay samtang intensity 3 sa Cebu, Mambajao, Camiguin Island; Bogo, Lapu-Lapu, Argao; Palo, Leyte ug uban pa. Sa maong linog walay natala nga kadaut ang Cebu Provincial Disaster Risk Reduction and Management Office.
Daghan usab nga Sugbuanon ang nipagawas sa ilang sentiment pinaagi sa social media nga basin ang pagpakita sa oar fish sa nilabay nga semana sa baybayon sa Lungsod sa Compostela maoy timailhan sa niigo nga linog. (Rowena D. Capistrano/GMR)
Radaza di magpaduol kang Chan
Dili na mag-opisina si Kongresista Paz Radaza sa Lapu-Lapu City Hall nga kanhi giokupar sa iyang anak nga si kanhi kongresista Aileen Radaza ug sa iyang bana nga si kanhi kongresista Arturo Radaza.
Kini nunot sa iyang pagtuo nga ang lawak gamiton na sa bag-ong mayor nga si Mayor Junard “Ahong” Chan nga dili nila kaalyado.
Gisaway hinoon ni Radaza si Chan sa pagpili niini og mga department heads nga dili taga Dakbayan sa Lapu-Lapu.
Matud ni Radaza nga ang maong lakang ni Chan nakapainsulto sa mga Oponganon nga mao lang usab unta ang makasabot sa mga molupyo nga ilang serbisyohan. “That is why we are one district and we developed because of the Oponganons,” pasabot ni Radaza.
Si Chan nipasabot nga gituyo niya kini sanglit ang iyang gikuha pulos na adunay kasinatian sa pagtuman sa ilang trabaho gikan sa laing lokal nga kagamhanan.
Gipangayo ni Chan ang paghatag lang og kahigayunan sa iyang pagka-mayor kay managlahi man ang ilang estilo ug pamaagi sa panerbisyo ngadto sa publiko. (/GMR)(BANATNEWS)