CEBU, Philippines — Masaligon ang Partido Barug-PDP-Laban nga makuha nila ang majority bloc sa konseho sa Siyudad sa Sugbo.
Atol sa oath taking sa partido kagahapon, nitambong sila si Konsehal Dave Tumulak ug Konsehal Jerry Guardo bisan dili sila kaalyado sa niaging eleksyon ni Mayor Edgardo Labella.
Sila si Guardo ug Tumulak una na nga nipadayag sa ilang pagsuporta sa administrasyon ni Labella.
Nunot sa maong kalambuan, sa paghatag sa pakigpulong ni Labella kini nibutyag nga indikasyon kini kun kinsa ang majority.
Si Tumulak subling niingon nga angayan kalimtan ang nahitabo dungan sa pagbutyag nga panaghiusa, kalinaw ug kalambuan ang gikinahanglan alang sa kaayuhan sa siyudad.
Wala sab niya direkta gitubag ang pangutana kun asa siya nga partido nahisakop.
Hinoon giklaro ni Labella nga wala niya gikonsiderar nga problema kun majority man sila o dili diha sa konseho kay siya nagtuo nga ang ubang miyembro sa konseho nga kaalyado sa BOPK mga objective man.
Gipahibawo sab ni Labella nga bisan og majority sila pabor siya nga hatagan og committee chairmanship ug membership tungod kay dili siya pabor sa ideya nga tungod kay ang konsehal sakop sa laing grupo dili kini hatagan og komitiba.
Samtang nagpasalamat si Labella kang Bise Mayor Michael Rama tungod kay gitugutan siya nga maka-opisina una sa Vice Mayor’s Office sulod sa usa ka semana human ang Office of the Mayor sa ikawalong andana sa Executive Building gihawanan pa sa mga gamit, gikuhaan og kisame, giputlan og kuryente, ang sawog gibakbak ug uban pa.
Adto una sa Cebu City Social Hall si Rama apan human sa usa ka semana mobalik na kini sa iyang opisina ug si Labella una temporaryong mag-opisina sa Senior Citizen’s Office samtang giayo pa ang kanhi opisina ni Rama sa ground floor sa Executive Building.
Nagkanayon si Labella nga ang proyekto ni kanhi Cebu City Mayor Tomas Osmeña sama sa Cebu City Public Library ipadayon niya ang operasyon niini 24-oras tungod kay nakatabang sab kini sa publiko.
“For anything and everything that would be beneficial to the people we’ll continue. This is not the type of governance that just cut it off because it came from the other administration. If there is any program that proves beneficial to the people of City of Cebu by all means let us continue, let’s stop politicking,” matud sa bag-ong mayor.
Ang oath taking sa Partido Barug-PDP-Laban gisugdan alas 10 sa buntag kagahapon pinaagi sa Santos nga Misa nga gitambungan sa mga pamilya, mga bisita ug dumadapig sa grupo.
Si Supreme Court Justice Amy Lazaro Javier maoy nag-administer sa oath taking sa grupo. (/GMR)(BANATNEWS)