CEBU, Philippines – Ipahigayon karong buntag ang turnover sa bag-ong administration sa Dakbayan sa Mandaue nga tambungan sa tanang napiling opisyal nga pangulohan ni Mayor-elect Jonas Cortes.
Kini ang gitug-an ni Atty. John Edu Ibañez, executive secretary ni Cortes ug kasamtangan nga magdumala sa Public Information Office sa dakbayan.
Matud ni Ibañez nga sa buntag ipahigayon ang turnover ug sa alas 2 sa hapon ngadto sa alas singko sa hapon ang oath taking sa mga napiling opisyal nga sugdan sa usa ka Santos nga Misa.
Sumala pa ni Ibañez nga ang maong kalihukan sa oath taking anha ipahigayon sa heritage ground ug tak-opan kini sa usa ka salo-salo. Dugang pa ni Ibañez nga ang mo-administer sa oath taking ni Cortes mao si Justice Marilyn Lagura-Yap.
Gitug-an ni Ibañez nga sa pagkakaron ang gihinganlan ni Cortes mao siya isip executive secretary ug PIO head, ug lakip usab ni Atty. Jamaal James Calipayan isip city administrator.
Si Ibañez nitug-an nga padayon pa usab karon ang evaluation sa performance sa mga trabahante sa Mandaue City Hall. (/GMR)(BANAT NEWS)