Mga bus suwayan pagpaagi sa underpass

CEBU, Philippines – Mopahigayon og dry run ang mga bus ug mini-bus sa pag-agi sa bag-ong gibuksan nga underpass sa Basak-San Nicolas, Dakbayan sa Sugbo karong Biyernes.

Gitug-an ni Julito Flores, pangulo sa Cebu Provincial Bus and Mini Bus Operators Transport Cooperative (CPBMTC), nga magsugod ang ilang dry run alas 9 sa buntag aron pagsuta sa epekto sa pag-agi sa mga bus sa dagan sa trapiko sa maong dapit.

Nialma ang mga bus operators sa planong dili pagpaagi sa ilang mga sakyanan sa underpass sanglit dili kini makiangayon.

“Unfair man na namo. Ngano man? Gi-detour mi kay magbuhat og tunnel or underpass unya ang gobiyerno nigasto og P700 million pagsulbad sa traffic situation sa F. Llamas ug N. Bacalso. Karon pag human didto lang gihapon mi didto, so unfair dapat naay consultation,” matud ni Flores.

Buot ni Flores nga papilion ang mga drayber sa bus kun asa sila moagi ilabi na panahon sa peak hours nga kasagaran mahitabo sa Lunes ug Biyernes.

“Kanang Monday pwede ra mi from south ari mi sa SRP agi, kanang naay option ang driver ba, kung naay daghan manaug from Tabunok going to Pardo so moagi mi pero kung walay monaug ari mi sa SRP, kanang peak hours, Monday ug Friday,” matud ni Flores.

Gituyo nga Biyernes ang dry run aron makita ang volume sa mga sakyanan. Si Flores nagkanayon nga kun dili motugot ang City Hall ubos sa pamunoan ni Mayor-elect Edgardo Labella nga paagion ang mga bus sa underpass, ila kining hangyoon nga hatagan og konsiderasyon ang mga bus.

Samtang gihangop sa mga kawani sa City Traffic Enforcement System (CTMS) sa Dakbayan sa Lapu-Lapu ang naangkon nga walo ka bag-ong motorsiklo sa ilang buhatan. Ang mga Yamaha XT model mobalor og P1.2 milyones nga nangabot sa niaging semana.

Matud sa pangulo sa maong buhatan, Mario Napule, nga unang higayon kini sukad siya nilingkod isip officer-in-charge sa maong buhatan. Ang mga maong mga motorsiklo gamiton sa mga traffic inspectors sa paglibot sa kadalanan sa adlaw ug gabii. (Romeo T. Limpangog/GMR)(BANAT NEWS)