Problema sa baha tutokan ni Labella

CEBU, Philippines — Gipahibawo ni Cebu City Mayor-elect Edgardo Labella nga duha ka paagi ang ilang himuon alang sa pagsulbad sa problema sa baha sa siyudad.

Una niini, kon mobunok ang kusog nga uwan ang dakbayan, makasinati dayon og pagbaha, dinhi himuon ang immediate approach nga una nang gisulti ni Labella atol sa iyang pangampanya nga mao ang pagpahigayon og massive dredging sa waterways, kanal ug mga sapa.

Paningkamutan sa umaabot mayor nga istoryahon ang tanang kapitan kaalyado man o dili aron pabuhaton sila og palisiya kabahin sa problema sa basura diin angay nga manglimpyo ang tanan ug aron dili mapunta sa mga kanal o kasapaan ang mga basura ingon man ang pag-segregate niini diha sa kabalayan.

Dugang niini nga kon dili motuman ang mga barangay officials, ang Department of Interior and Local Government na ang ilang atubangon.

Sa himuon nila nga long term approach mao ang pag-umol og comprehensive drainge plan sa siyudad diin matud ni Labella moumol siya og komitiba nga maoy motutok niini. Makig-alayon usab siya sa silingang mga local government units aron tukion ang problema sa baha kay kon magbaha ang usa ka lugar ang tanan apektado.

Sigon niya nga nagsugod na sila og istorya kang Governor-elect Gwendolyn Garcia, ug duna na sab silay preliminary talks ni Mandaue City Mayor-Elect Jonas Cortes ug makig-istorya sab siya kang Talisay City Mayor-elect Samsan Gullas.

Ang maong plano lakip sa hatagan og pagtagad ni Labella sa iyang first 100 days sa iyang paglingkod.

Sa laing bahin, hugot nga gibantayan sa buhatan sa City Disaster Risk  Reduction and Management sa Dakbayan sa Mandaue ang mga dapit  nga makasinati og mga pagbaha sa panahon nga kusog ang pagbunok sa uwan.

Si Art Bisara sa Command Center sa maong siyudad miingon nga naglakip sa mga lugar nga ilang gibantayan mao ang Mahiga Creek sa Brgy. Subangdaku, dalan A.S. Fortuna dapit sa Rolling Hills ug Relocation Site sa Brgy. Paknaan.

Kahinumduman nga niadtong Domingo sa hapon, unang nakasinati og pagbaha nga miabot sa tuhod kadalanan sa Brgy. Subangdaku dihang miawas ang Mahiga Creek. Apan napugngan ang pagdagayday sa tubig niini dihang naalihan kini sa mga basura.

Nunot sa baha, daghang pasahero ang na-stranded daplin sa karsada mao nga ilang gipadagan ang  mga government vehicle aron mahatod ang mga pasahero ngadto sa ilang destinasyon sama sa Dakbayan sa Lapu-Lapu ug Lungsod sa Consolacion.

Dugang ni Bisara nga wala mobaha niadtong Domingo ang dalan A.S. Fortuna, mga dapit sa Brgy. Tipolo ug Paknaan nga ila usb gibantayan. (BANAT NEWS)