Training center sa Mandaue gisubhan

CEBU, Philippines — Hingpit nga gisubhan ang bag-ong tunghaan sa Center for Healthcare Profession of Cebu, Inc. nga nahimutang sa kanhi Innodata sa Barangay Subangdaku, Dakbayan sa Mandaue.

Kini nagtanyag og mga kurso nga magamit kaayo sa pagsulod og trabaho nga dili lang sa lokal nga pagpangita og trabaho kun dili lakip na sa gawas sa nasud.

Ang kalihukan gitambungan nilang Bernard Restificar, pangulo sa CHP Cebu ug chief executive officer; Dr. Francisca Opog, TESDA Provincial Director; Dr. Rogelio Garbo, South District Supervisor ug uban pa.

Naglakip sa gitanyag nga mga kurso mao ang Caregiving NC II, Healthcare Services, Elderly Care and Hospital Care, Hilot (wellness massage) NC II, Pharmacy Services NC II , Housekeeping NC II ug daghan pa.

Si Restificar nipahibawo nga nagpadayon na usab ang ilang pagdawat sa mga tinun-an sa Senior High School.

Matud niya nga ang mga makat-onan sa ilang mga tinun-an sa Senior High School daku kaayo ang kapuslanan sanglit mahimo man nilang magamit sa ilang pagsulod og trabaho ug ingon man sa ilang pagpadayon og tungha sa kolehiyo.

Si Jerome Tago, SHS coordinator, niingon nga kadtong ilang mga tinun-an sa Senior High School mahimo kaayo nga mangaplay og trabaho sa gawas sa nasud tungod kay sa ilang pagradwar adunay magbaton na usab sila og NC II nga mo-qualify kanila sa ilang pagtrabaho sa ubang kanasuran gikan sa TESDA. (/GMR)(BANATNEWS)