Pagpangawat gilantaw nga motibo sa pagpatay sa Tsinoy

CEBU, Philippines – Pagpangawat ang gitan-aw karong motibo sa kapolisan sa nahitabong pagpusil patay sa usa ka Tsinoy niadtong Domingo diha sa Barangay Cubacub, Dakbayan sa Mandaue.

Si Yi Feng Yang, 51-anyos patay na nga naabot sa tambalanan samtang ang duha ka anak niini nga nagpanuigon og 18 ug 16-anyos ang parehong nangaangol human sila pamusila sa upat ka lalaki nga nagsakay og duha ka XRM nga motorsiklo.

Ang direktor sa Mandaue City Police Office, Police Colonel Julian Entoma nagkanayon nga nawala na sa crime scene ang butanganan sa halin nga gidala sa biktima. Giingong base sa gibutyag sa anak nga babaye niini matag uli nila dalhon sa iyang amahan ang halin sa duha ka general merchandise nga negosyo nila diha sa Lungsod sa Consolacion diin dili mo ubos sa P100 mil ang matag adlaw nilang halin sa duha ka tindahan.

Matud ni Entoma nga sa ilang imbestigasyon nasuta nga kaila ang mga kriminal sa biktima diin nahibaw-an na  ang patter ug nakahibawo usab sa butanganan sa halin.

Nunot niini, ang tanang empleyado sa tindahan maoy person of interest sa maong kaso.

“Leaning na mi karon sa robbery nga anggulo, amo pa interview-hon ang mga empleyado kay ang mga empleyado ra man ang nakahibaw nga nagdala ni og kwarta, tan-awon nato kon kinsa ang sinaligan ani”, tug-an ni Entoma. Gipaubos usab sa forensic examination ang cellphone ni Yang aron masuta kon aduna ba kini nadawat nga mga death threats sa wala pa nahitabo ang pagpatay. (/BDB)(BANAT NEWS)