CEBU, Philippines – Nalandig sa tambalanan ang usa ka supervisor sa tindahan og lechon manok human kini tigbasa sa iyang sakop niadtong Martes sa udto diha sa Barangay Lagtang, Dakbayan sa Talisay.
Ang biktima mao si Jilios De los Santos, 42-anyos, supervisor sa Sr. Pedro Lechon Manok. Samtang ang suspetsado mao si Raymund Castro, hingkod ang panuigon tindero sa maong tindahan.
Sa imbistigasyon sa kapolisan nasuta nga niadtong Hunyo 16 niining tuiga gitigom sa biktima ang iyang mga sakop ug nidesisyon kini nga ibalhin ang pipila ka empleyado nga naa diha sa branch sa Barangay Lagtang ngadto sa laing branch.
Giingong nasuko ang suspetsado hinungdan nga nitumaw ang panaglalis.
Ang biktima nihimo kini og survey ngadto sa mga empleyado nga kinahanglan nga ibalhin ug nihimo kini og laing tigom.
Sa maong tigom nahisgutan gihapon nila ang pagbalhin ug nitumaw ang laing lalis tali sa biktima ug suspetsado.
Dihang nisakay na sa iyang motorsiklo ang biktima giingong gikalitan kini og tigbas sa suspetsado sa makadaghan gamit ang ilang sundang nga itadtad sa ilang baligya nga lechon manok.
Ang biktima kinsa nakaangkon og mga samad tinigbasan sa iyang nawong daling gidala ngadto sa Talisay City District Hospital.
Ang suspetsado dali kining nisibat human sa maong hitabo ug gibilin ang sundang nga iyang gigamit sa pagpanigbas. (/BDB)(BANAT NEWS)