Sugbo makasinati og alimuot nga panahon

CEBU, Philippines – Ang Sugbo makasinati og init nga panahon ug alimuot nga adunay pat-ak-pat-ak sa ulan sa hapon ug gabii tungod sa localized thunderstorm.

Kini ang gitug-an ni Engineer Al Quiblat, hepe sa Philippine Atmospheric Geophysical and Astronomical Services Administration (PAGASA) Mactan-Cebu Station.

Matud ni Quiblat nga ang maong forecast masinati hangtud sa adlaw nga Sabado ug giawhag ang katawhan nga mag-andam o magdala ug panagang sa init ug ulan.

Ang mga nasinati nga ulan sa nanglabay nga adlaw nakatabang kini sa kakulangon sa tubig apan dili pa kini paigo. Ang PAGASA aduna lang kini natala nga 21 mm nga gidaghanon sa ulan gikan Hunyo 1 hangtud 17.

Gitug-an usab ni Quiblat nga kanunay silang nagpagawas og thunderstorm warning sa niaging adlaw sa mga lugar sa Sugbo.

Dugang ni Quiblat nga posibleng adunay tornado tungod kay usa kini sa mga features sa thunderstorm apan dili pa usab nila masiguro tungod kay walay kapabilidad ang ilang ekipo nga maka-detect og tornado. (/BDB)(BANAT NEWS)