CEBU, Philippines — Nangayo og pasaylo si Talisay City mayor-elect Gerald Anthony “Samsam” Gullas ngadto sa iyang mga konstituwente ingon man sa mga motorista nga nahasol sa baha sa Barangay Bulacao, Dakbayan sa Talisay niadtong miaging semana.
Iyang gitug-an nga naabot sa iya ang reklamo sa kadaghanan human sa pagbunok sa uwan niadtong Hunyo 14 ning tuiga tungod sa pagsaka sa tubig diha mismo sa karsada sa Bulacao nga nakaingon sa grabeng traffic.
Si Gullas nagkanayon nga iya nang gitawag ang atensyon ni Engr. Leslie Anthony Molina sa Department of Public Works and Highways (DPHW) labot sa maong reklamo.
Ang maong naglunop nga dalan sakop sa hurisdiksyon sa DPWH. Matud pa ni Gullas si Molina nipasalig nga ilang tawgon ang atensyon sa kontraktor nga nagtrabaho sa kanal sa maong dapit.
Matud pa ni Gullas nga mao kini ang ilang prayoridad sa pagkakaron human sa paganunsyo sa taga PAGASA nga mosulod na ang panahon sa tinguwan.
Iyang giangkon nga kun dili kini matagaan og dinalian nga pagtagad mahasol gyud og maayo ang mga tawo ilabi na kun mobunok ang uwan.
Gusto sa batan-ong mayor nga mahibawo kun unsa ang mga plano ug pagabuhaton sa taga DPWH labot niining baha.
Iya sab nga gipasaligan ang DPWH nga motabang ang siyudad kanila kun gikinahanglan aron lang gyud mapadala ang pagsulbad sa maong problema.
Dugang pa niya nga nakasugat sila og susamang problema diha sa may Cebu South Coastal Road (CSCR) sa miaging mga semana ug kini ilang natagaan og solusyon pinaagi sa pagtinabangay.
Kagahapon, gipalimpyohan ni Gullas ang kanal nga gibaha sa Barangay Bulacao. (/IBM)(BANATNEWS)