Guardo huwat sa mando sa Comelec
CEBU, Philippines – Dili pa makasulti si Konsehal Jerry Guardo sa Dakbayan sa Sugbo kung mahulipan na ba niya si Konsehal Alvin Arcilla kansang kandidatura sa niaging eleksyon ang gikanselar sa Commission on Elections (Comelec).
Matud ni Guardo kinsa nahimutang sa ika-siyam sunod kang Arcilla nga sayo pa aron maglaum nga maproklamar siya isip konsehal.
Si Arcilla nahukman sa Comelec nga dili na pwede makapapili sa samang posisyon sanglit nahuman na ang iyang tulo ka sunod-sunod nga termino sukad niadtong 2010-2013, 2013-2016 ug 2016-2019 nga mapupos karong Hunyo 30.
“I am not expecting, wait lang gyud ta og unsa gyud ang decision puhon...I believe the party has still the legal option so we just wait until this will be resolved,” sigun pa ni Guardo.
Si Arcilla dunay lima ka adlaw aron makakuha og temporary restraining order (TRO) aron kini makaapelar sa Korte Suprema sa desisyon sa Comelec En Banc.
Usa ka Allen Canoy ang niduso og petisyon sa Comelec sa pagka-disqualify kang Arcilla sa niaging eleksyon.
Si Mayor-elect Edgardo Labella nagkanayon nga kun si Arcilla dili makakuha og TRO, ang desisyon sa En Banc mahimong “final and executory”.
Samtang si Comelec Cebu City North District Election Officer, Atty. Chauncey Boholst, niingon nga na-served na nila ng desisyon sa Comelec En Banc kagahapon. Kagahapon sab nagsugod ang lima ka adlaw nga gihatag nga panahon kang Arcilla aron makakuha og TRO. (/GMR)(BANAT NEWS)
- Latest
