Underpass buksan bisan way inauguration

CEBU, Philippines — Hayan madayon ang pagbukas sa P638-million underpass project sa Natalio Bacalso Avenue, Siyudad sa Sugbo karong Hunyo 15 bisan og walay inaugural ceremony nga mahitabo.

Si Department of Public Works and Highways 7 Project Engineer Roy dela Cruz niingon nga wala pay petsa kun kanus-a gyud mapahigayon ang inaugural ceremony.

Matud ni dela Cruz nga dunay representante gikan sa ilang central office ang moabot karong Huwebes o Biyernes ug mosusi sa underpass dayon diha pa mahibaw-an ang inauguration date.

Apan gusto ni dela Cruz nga ang ilang gisulti nga buksan ang underpass karong Hunyo 15 matuman hinungdan nga sa ilang meeting karong adlawa tali sa Cebu City Transportation Office, kini mohangyo kun mahimong buksan ang underpass sa maong petsa ug isunod nalang ang inauguration.

“Among i-discuss if pwede ba ta i-open nalang nato then later naay inauguration date will come later then i-close nato og balik pwede ra man sad, kay akong gusto unta nga kung mo-prefer ko niingon naman ta og June 15, i-open gyud nato og June 15 whether naay inaugurate siya or wala, so ma-late ang inauguration i-close lang nato og balik good for pila ka hours niya mahuman og inaugurate open na sad og balik niya sige na siya og open,” matud ni dela Cruz.

Sa kasamtangan si dela Cruz niasoy nga siyento porsiyento na nga kompleto ang underpass sanglit ang kontraktor nga mao ang WT Construction, Inc. nahuman na sa major activities sa konstraksiyon sukad niadtong Agosto 2017.

“Ready nata for inauguration and for the opening, despite guro wala pay inauguration akong i-suggest nila if pwede ba ta mo-open nya later inauguration will come later,” dugang ni dela Cruz.

Karong adlawa, ang CCTO, DPWH ug WT Construction, Inc. magtagbo aron pag-finalize sa traffic scheme sa south district sa Cebu City ug adto kini sa buhatan sa DPWH sa South Road Properties sa ala 1 sa hapon. Pipila sa mga tukion nila kun tugutan ba  ang mga public utility jeepneys sa pag-agi sa underpass ug uban pa. (BANAT NEWS)