PUJ, firetruck, awto nagkarambola

CEBU, Philippines – Duha ang patay ug 27 ang nangaangol sa karambola sa jeep, fire truck ug usa ka pribadong sakyanan didto sa Barangay Mansasa, Dakbayan sa Tagbilaran, Bohol kagahapon sa hapon. Wala pa mohatag ang Tagbilaran Police Station sa mga pangalan sa duha ka mga nakalas sa maong insidente.

Si Police Major Christopher Navida,  hepe sa maong estasyonan nagkanayon nga sa inisyal nga imbestigasyon nasuta nga kusog ang padagan sa usa ka pampasaheroang jeep paingon sa Loboc.

Matud niya 28 ka mga tawo ang sakay niini lakip na ang drayber sa dihang giingong kalit kining nikawat sa kasugat nga lane ug nabangga sa kasugat nga firetruck sa Baclayon ug gisundan sa usa ka pribadong sakyanan. Tungod sa kakusog sa dagan nalahos pa gyud ang jeep sa usa ka waiting shed dayon nalahos sa pangpang ug natagak sa dagat. “Buti na nga lang na sumalpok siya kasi kung hindi, based sa speed niya, siguradong mas malayo yung landing niya, mas maraming mamamatay,” sigun sa maong hepe.

Ang mga biktima gidala tanan sa Governor Celestino Gallares Memorial Hospital.

Ang mga nakalas pulos mga babaye samtang kritikal ang uban sa 37 ka pasaherong nangaangol nga pulos gitabang sa mga tawo pagpagawas sa jeep nga nakulob na sa dagat ug gidala sila sa daplin. (/IBM)(BANAT NEWS)