CEBU, Philippines – Si senator-elect Francis Tolentino nagkanayon nga walay rason nga wagtangon ang K-12 program human nga ilang nakita nga malampuson ang resulta sa maong programa.
Ang maong pamahayag ni Tolentino atol sa iyang pagbisita sa nilabay’ng adlaw diha sa Dakbayan sa Talisay.
Samtang si Dr. Arden Monisit, schools division superintendent sa Siyudad sa Talisay nagkanayon nga naa ang ilang suporta sa maong programa tungod kay nakita nila ang maayong resulta niini ngadto sa kabataan.
Matud ni Monisit nga adunay pipila nga nisupak tungod kay giingong taas na ang antoson sa mga ginikanan sa pagpatungha sa ilang mga anak lakip na ang gastohan.
Gipadayag ni Monisit nga iyang nakita nga dihang nadestino pa siya sa Dakbayan sa Mandaue ang mga tinun-an nga nigradwar sa senior high school nakatrabaho na sa pribadong kompaniya samtang ang walay interest sa skilled work nipadayon sa pagtungha sa kolehiyo.
Niining ulahi lang, adunay nitumaw nga estorya diha sa social network nga giingong wagtangon ni Presidente Rodrigo Duterte ang K-12 program apan gihimakak sa Malacañang ang maong taho.
Sa laing bahin, nagmalampuson ang pagbukas sa unang adlaw sa klase sa Siyudad sa Talisay. Kini maoy gipahibawo ni Police Lieutenant Colonel Marlu Conag, hepe sa Talisay City Police Station.
Matud ni Conag nga sayo niyang gipakatap diha sa mga tulonghaan sa siyudad ang iyang mga sakop.
Si Conag uban ni Brigadier General Debold Sinas, direktor sa Police Regional Office (PRO-7) ug Police Colonel Manuel Abrugena, direktor sa Cebu Provincial Police Office (CPPO) nilibot sa matag tunghaan niadtong Lunes. (/BDB)(BANAT NEWS)