60 nigradwar sa CTU Mountain

CEBU, Philippines — Nikabat sa 60 ka estudyante ang nigradwar niadtong Sabado sa Cebu Technological University (CTU) Cebu City Mountain Satellite Campus.

Ang kalihukan gipahigayon sa luyo sa Chateau de Busay sa Barangay Busay, Dakbayan sa Sugbo.

Sa iyang mubo nga mensahe, gipasabot ni Dr. Rosein A. Ancheta Jr, ang CTU President, ngadto sa 60 ka nigradwar uban sa ilang mga ginikananan ang iyang kalipay nga nakatabang ang CTU sa paghatag og hustong edukasyon sa mga molupyo sa bukirang bahin sa Dakbayan sa Sugbo.

Nasayran nga may duha pa ka kurso ang gitanyag sa CTU System nga mao ang Bachelor in Elementary Education (BEED) ug Bachelor of Science in Industrial Technology (BSIT) Major in Computer Technology nga maoy nahuman sa unang hut-ong sa mga nigradwar diin unom kanila ang nakakuha og mga Latin Honors nga pulos mga Cum Laude.

Uban usab si Dr. Vic Villaganas, ang CTU Vice President for Academic Affairs, ug uban pang mga opisyal sa CTU nga nanghatag sa mga diploma sa mga nigradwar.

Gitambungan sab ang kalihukan nila ni Kongresista Rodrigo “Bebot” Abellanosa kinsa maoy nangusog nga matukod ang tunghaan ug ni Dr. Maximo Aljibe, ang director sa Commission on Higher Education 7. (BANAT NEWS)