Nanulis og gasolinahan way nadala

CEBU, Philippines — Napurnada ang tinguha sa usa ka nag-inusarang tulisan human wala kini makadayon og pagpanulis sa gasolinahan sa may Barangay Simala sa Lungsod sa Sibonga niadtong Biyernes

Matud ni Police Master Sergeant Herbert Pananganan, imbestigador sa Sibonga Police Station, midangop sa ilang buhatan ang staff sa Petron Gas human sila suway nga gitulis sa nag-inusarang tulisan nga nagpakaaron-ingnon nga customer.

Sumala pa ni Pananganan, niabot sa gas station ang wala mailhing tulisan ug magpagasolina, sa dihang giatiman sa pump boy kalit kining mibunot sa iyang armas dayon deklarar og tulis. Apan wala kini madayon sa dihang adunay niabot nga laing customer hinungdan nga nakadagan ang attendant ngadto sa cashier dayon nanira.

Gitug-an sa imbestigador, suway pa nga gipapahawa sa tulisan ang laing customer sa tinguha nga ablihan ang cashier’s booth apan wala gyud kini kaabli tungod sa kamaayo sa pagkasira, hinungdan nga misibat na lang kini ug walay nabitbit paingon sa habagatan sakay sa iyang motorsiklo.

Ang kapolisan sa Sibonga mihimo og pagpatrolya sa lugar alang sa dugang pakisusi. (/DILT)(BANATNEWS)