CEBU, Philippines — Mga suspendidong operatiba sa Cebu Provincial Police Office- Intelligence Branch tungod sa nahitabong ‘misencounter’ tali kang Police Corporal Feliciano Yballe Jr., pabalikon na sa serbisyo karong Hunyo.
Nasayran nga 18 ka polis gipangsuspenso nunot sa misencounter nga gikamatay ni Yballe kinsa sakop sa Cebu City Police Office.
Ang direktor sa Police Regional Office-7 Brigadier General Debold Sinas nagkanayon nga magpadayon ang kasong administratiba batok sa maong mga operatiba sanglit giingong wala nay planong mopasaka og kasong kriminal ang asawa ni Yballe. Ang Regional Internal Affairs Service (RIAS) -7 na ang naggunit sa maong kasong administratiba. Samtang nagdagan ang proseso sa maong kaso, sigun ni Sinas nga mamahimo gihapon makapahigayon og operasyon ang maong mga operatiba. Ibalik na sab ang ilang badge ug mga armas.
“We are more than happy po sa recent development and sa announcement po ng ating Regional Director. We are very much thankful po Regional Director for not losing his trust sa ating personnel,” si Police Colonel Manuel Javier Abrugena miingon.
Si Sinas miingon nga nagpaboto og una si Yballe sa mga operatiba sa PIB nga giingong nanuktok ra unta sa iyang balay aron magpakuyog padung sa Barangay Sinsin niadtong Mayo 1.
Didto sa Barangay Sinsin gikatahong nagtago ang suspek nga mibanhig patay sa laing operatiba sa PIB nga si Police Master Sergeant Junard Cinco didto sa Barangay Media Once, Dakbayan sa Toledo niadtong Abril 30 sa buntag.
Gihimakak sa kapolisan nga si Yballe maoy suspek pagpatay kang Cinco sukwahi sa mga unang nigawas nga report. (BANAT NEWS)