Kabataan sa 4Ps pabalikon pagtungha
CEBU, Philippines — Suportado sa Department of Social Welfare and Development sa Central Visayas ang tinguha sa gobiyerno nga mabalik ang kabatan-onan sa pag-eskwela pinaagi ubos sa ilang advocacy campaign nga “Bata Balik Eskwela.”
Sa dili pa magsugod ang abli sa klase sunod buwan, ang mga DSWD-7 staff nibisita sa mga pamilya nga benepisyaryo sa Pantawid Pamilyang Pilipino Program (4Ps) aron pag-awhag sa mga anak nga niundang sa niaging tuig nga magpa-enrol karong tuiga.
Matud ni DSWD-7 Director Rebecca Geamala nga sa home visit, ang Pantawid City o Municipal Link makighinabi sa ginikanan ug ilang mga anak aron masuta kun unsay mga babag nga dili maka-eskwela ang ilang mga anak.
Ang pagpasulod sa eskwelahan sa mga bata maoy usa sa mga importanteng kondisyon sa mga 4Ps nga benepisyaryo aron ang pamilya makabenepisyo sa binuwan nga educational grant alang sa kabataan sa tag P300 sa elementarya ug P500 sa haiskul.
Ang 4Ps usa ka conditional cash transfer program sa gobiyerno nga gidumala sa DSWD diin nag-invest kini sa panglawas ug edukasyon sa mga pobreng pamilya.
Ang Central Visayas adunay 279,980 ka household beneficiaries diin sa maong gidaghanon sa pamilya adunay 454,386 ka children beneficiaries.
Matud ni Geamala nga ang tumong sa Pantawid Pamilya - Bata Balik Eskwela campaign nga partnership usab sa Department of Education nga maawhag o madani ang mga children beneficiaries nga magpa-enrol og balik aron magamit nila ang program benefits.
Sa tinguha nga mahibalik ang mga bata sa pag-eskwela, si Geamala nidason nga adunay ipanghatag nga school supplies sa mga returning students sa panahon sa ting-abli sa klase karong tuiga.
Matud niya nga nidawat og mga donasyon ang ilang buhatan gikan sa mga nagkalainlaing grupo o organisasyon nga gustong motabang. (/GMR)(BANATNEWS)
- Latest
