Pipila ka karsada isirado atol sa Gabii sa Kabilin

CEBU, Philippines – Temporaryong isirado sa Cebu City Transportation Office (CCTO) ang pipila ka dalan sa siyudad subay sa selebrasyon sa “Gabii sa Kabilin 2019”, gikan sa alas 5:00 sa hapon karong adlaw hangtud sa ala 1:00 sa kadlawon sa Mayo 25. Lakip sa mga dalan nga maapektohan mao ang E. Aboitiz Street, Lopez Jaena Street, Mabini Street, P. Burgos Street, Colon Street ug Osmeña Boulevard.

Nunot niini, daghan sa mga public utility jeepney ug ubang sakyanan ang i-reroute subay sa advise sa CCTO. Ang tanang sakyanan ingon man PUJs nga moagi sa Colon Street gikan sa Leon Kilat St. mo-left turn sa D. Jakosalem Street paingon sa ilang destinasyon.

Ang PUJs nga padulong sa SM City, Cebu mo-right turn sa Imus Road, deretso sa Imus New Road paingon sa ilang destinasyon, ang mga pribadong sakyanan mahimong moagi sa Osmeña Boulevard o diha sa .D. Jakosalem Street. Ang tanang sakyanan apil na ang PUJs gikan sa Sikatuna Street nga paingon sa Colon Street mo-right turn diha sa Zamora Street paingon sa Sanciangko Street o mo-right turn sa D. Jakosalem Street padulong sa ilang destinasyon.

Ang tanang PUJ nga padulong sa north reclamation area nga moagi diha sa Junquera Street samtang moagi sa P. del Rosario moderetso sa Imus Street, right turn sa Sikatuna Street, left turn sa T. Padilla Street dayon sa ilang destinasyon. Ang pangulo sa CCTO Atty. Ismael Garaygay, III nagkanayon nga moabot sa 20 ka traffic enforcer ang ipakatap sa mga apektadong dapit aron mo-monitor ug mobantay sa dagan sa trapiko gikan sa alas 4:00 sa hapon hangtud  mahuman ang kalihukan.

Matud ni Garaygay nga lauman ang kahuot sa trapiko gumikan sa temporaryong pagsira sa pipila ka dalan. Giawhag niini ang publiko nga likayan lang una ang mga apektadong dapit aron dili sila mahasol ug matanggong sa kahuot sa trapiko. (/BDB)(BANAT NEWS)