Bobby Nalzaro mag-atubang og kasong libel

CEBU, Philippines – Nakakita og igong basihan ang piskalya sa pagpasaka og kasong libel batok kang broadcast-journalist Pablito “Bobby” Nalzaro ngadto sa korte,  kabahin sa iyang lindog nga gipublikar niadtong Sityembre 2018 sa usa ka local newspaper ug sa online nga adunay titulo nga “Projecting a Pro-poor Image” ug “Mikakak Man Diay.” Matud ni Ramon Miguel Osmeña, anak ni Cebu City Mayor Tomas Osmeña, ginganlan siya sa column ni Nalzaro nga apil sa ilegal nga negosyo sa butane canister refilling.

Si Prosecutor 1 Russel Busico mirekomenda sa pagpasaka og kasong two counts of libel ubos sa Revised Penal Code ug two counts of online libel ngadto sa korte human pakyas sa pagtubag sa alegasyon si Nalzaro. Mihimakak si Osmeña sa pasangil nga part-owner siya sa usa ka ilegal nga negosyo ug tungod sa maong lindog ni Nalzaro, nakaguba kini sa iyang reputasyon isip usa ka pribadong indibidwal.

Sa habig ni Nalzaro, usa ka privileged communication ang mao niyang lindog ug dili kini matawag nga libel kay usa sab ka public figure si Osmeña.

Nahimong pruweba sa gireklamo mao ang away tali ni Miguel ug sa aktres nga si Ellen Adarna nga naabot pa gani sa national media ug giingong mikatap sab sa social media.

Nunot niini, matud ni Busico nga ang batan-ong Osmeña dili usa ka public figure bisan pa og anak siya sa mayor ug konsehal ingon man apo sa kanhi presidente kay dili man siya kanunay makita sa publiko. Ang giingong away nila ni Adarna dili kadto alang kang Miguel apan alang kadto sa mayor.

Ang manlalaban ni Nalzaro nga si Atty. Joan Baron, nagkanayon nga mo-file sila og motion for reconsideration sa piskalya diin ilang ilakip ang affidavit ni Douglas Labra, nga maoy namasangil kang Tomas ug Miguel nga nalambigit sa ilegal nga negosyo sa butane. (/DILT)(BANAT NEWS)