CEBU, Philippines — Magpahigayon na sugod karong adlawa ang mga magtutudlo sa mga publikong tulunghaan sa pagpahigayon sa Brigada Eskuwela aron pangandaman ang umaabot nga ting-abli sa klase sa sunod buwan.
Dungan nga magpahigayon og Brigada Eskuwela mao ang mga tulunghaang publiko sa Dakbayan sa Mandaue, Dakbayan sa Lapu-Lapu, Lungsod sa Cordova, Consolacion ug ingon man ang silingang kalungsoran sa amihanang bahin sa lalawigan.
Si Dr. Rhea Mar Angtud nga maoy Provincial Schools Division superintendent miingon nga bisan sa mga kahago nga ilang nasinati sa miaging piniliay, kinahanglan nilang pangandaman ang umaabot nga tingklase pinaagi sa Brigada Eskuwela.
Niadtong miaging Sabado nga gilusad sa Department of Education sa Central Visayas ang Brigada Eskwela sa amihanang bahin nga kalungsoran nga naglakip na sa Carnaza Elementary School nga usa ka gamay nga isla nga sakop usab sa lungsod sa Daanbantayan.
Dugang pa niya nga ang maong tulunghaan maoy ilang gihatagan og dakong pagtagad tungod kay layo kini ug daghang mga kuwang.
Iyang giawhag ni Angtud ang mga ginikanan ingon man ang uban pang mga stakeholders nga moapil sa Brigada Eskuwela nga pagahimoon karong tuiga. Sama sa naandan, gipaabot nga dili lang mga ginikanan ug mga estudyante ang magpanon aron mosalmot sa Brigada Eskwela sanglit may mga pribadong kompanya ug mga organisasyon sagad mangapil.
Gawas pa niana, ang kapolisan ug militar mopadala usab og mga representante aron motabang sa pagpanglimpyo ug pag-andam sa mga lawak-saringan sa mga bata.
Si Angtud miingon nga magsugod sa Mayo 20 ang Brigada Eskuwela ug matapos kini sa Mayo 24.
Gitataw ni Angtud nga moabot sa 700,000 ang mga tinu-an ang motungha sa tanang ang-ang sa publikong tulunghaan ubos sa iyang buhatan.
Iyang gipanglantawan nga mosaka og dos ngadto sa singko porsiyento ang pagsaka sa gidaghanon sa mga tinun-an nga motungha karong tuiga. (/IBM)(BANATNEWS)