Mga parokya nagtigom alang ika-500 nga Kristiyanismo

CEBU, Philippines – Ang Archdiocese of Cebu nangandam alang sa ika-500 katuig nga Kristiyanismo sa Pilipinas.

Kagahapon ang Pagsangyaw 2021 Team nga gipangulohan ni Fe Mantuhac-Barino tuyo nga nibisita sa District 6 sa amihanang bahin sa Sugbo nga gilangkuban sa mga parokya sa Daanbantayan, Bogo, Tabogon, Kawit Medellin, Maya Daanbantayan, Tapilon ug uban pa ang nagtigom kalabutan sa pagsangyaw.

Ang matag delegado sa matag parokya ang nakahimo na sa ilang Pagsangyaw 2021 sa wala pa ang misa samtang ang uban gipakatap na ngadto sa mga kapilya.

Usa ka batan-on sa St. Ignatius of Loyola Parish sa Kawit Medellin nga si Joshua Arrieglo nipaambit nga oportunidad kaayo sa mga batan-on ang Pagsangyaw 2021 tungod kay nagpakita kini nga ang kabatan-onan apil diay sa simbahan ug dili lang ang mga hamtong.

Si Arrieglo nibutyag nga aduna usab sila’y gihimo nga mga kalihukan subay sa Pagsangyaw 2021.

Samtang si Padre Lyndon Ruiz, kura paruko sa St. Ignatius of Loyola malaumon nga  pinaagi sa Pagsangyaw 2021 ang listener mahimo na unyang speaker ug ang beneficiary mahimo nang benefactor diin ang tanan mahimo nang malamboon.

Si Barino sa iyang bahin, nagkanayon nga ang ilang kalihukan gihimo aron maduol ang commission on the laity sa mga layko ug masuta ang actual nga implementasiyon sa Pagsangyaw 2021.

Matud ni Barino nga pinaagi niini masuta usab nila ang panginahanglanon sa mga parokya sa pag-implementar sa maong kalihukan hangtud  sa 2021.

Giingong walo gikan sa 15 ka parokya ang nitambong sa maong tigom. (/BDB)(BANAT NEWS)