200 ka tiglimpyo sa polling centers ug kadalanan

CEBU, Philippines — Moabot sa 200 ka street cleaners ang i-deploy aron molimpyo sa mga polling centers ug kadalanan gikan sa mga basura sugod sa alas tres sa kadlawon sa Mayo 13.

Ang officer-in-charge sa Department of Public Services nga si John Paul Gelasque miingon nga ang iyang buhatan nakadesisyon nga mopahigayon og clean-up operation aron sa pag-obserbar sa kalimpyo sa palibot human sa eleksiyon.

Gilauman nga ang mga basura magkatag sulod ug gawas sa polling centers gumikan sa kadaghan sa tawo nga mobotar sa piniliay.

Matud niini adunay dili momenus 31 ka dump trucks ug compactor trucks ang andam na alang sa deployment nga maoy mohakot sa mga basura ngadto sa final disposal site.

Dili pa hinuon makahatag si Gelasque og pila ka toneladang basura ang gilauman nga makolekta nila human sa eleksiyon apan kini miingon nga daghan gyud kini.

Gawas sa basura gikan sa mga tawo, ang mga street cleaners mangolekta sab og campaign materials nga matangtang sa mga posting areas. Ang pangulo sa Cebu City Environment and Natural Resources Office (CCENRO) nga si Nida Cabrera miingon nga ang ilang buhatan dili mo-deploy og Barangay Environmental Officers (BEOs) nga mo-isyu og citation tickets tumong sa maong kalihukan.

Mibutyag usa kini nga wala sila mi-establisar og bisan unsa nga eco-stations ngadto sa mga polling centers sanglit aduna nay basurahan ang mga tunghaan.

Apan si Cabrera miasoy nga ang mga BEO motabang sa DPS sa paglimpyo sa siyudad aron mapaspasan ang clean-up operation. (/DILT)(BANATNEWS)