Grupo ni Quisumbing malaumon nga buligan

CEBU, Philippines — Ang grupo sa Hugpong Mandauehanon sa Pagbabago nga gipangulohan ni Reelectionist Mayor Gabriel Luis "Luigi" Quisumbing nagpasalamat ngadto sa mga Mandauehanons sa ilang suporta sulod sa 45 ka adlaw nga pangampanya atol sa gipahigayon nila nga Miting de Avance niadtong Sabado sa gabii.

"Nanghinaot ko nga unta ang inyong suporta namo magpadayon. Gikinahanglan gyud namo ang inyong suporta karong Mayo 13 aron mapadayon nato ang mga kalambuan sa atong siyudad," matud ni Quisumbing ngadto sa gibana-banang 25 mil ka mga supporters nga nanambong sa maong tigom.

Sila si Cebu governor Hilario "Junjun" Davide III nga buot magpapili pagka bise gubernador ug si bise gobernador Agnes Magpale kinsa magpapili isip gobernador, mitambong usab sa grand rally ug nanghinaot nga sila buligan sa mga Mandauehanons ugmang adlawa.

Ang mga kandidato sa HMP nagpasundayag usab diin ang uban niini mibalak, misayaw ug ingon man midalit og usa ka kanta si Quisumbing nga nakapahugyaw sa mga nanambong. (/DILT)(BANATNEWS)