Mandaue sa Binaliw landfill na naglabay og basura

CEBU, Philippines – Gibalhin na sa kagamhanan sa Dakbayan sa Mandaue ang ilang paglabay og basura ngadto sa Binaliw Landfill nga nahimutang sa Brgy. Binaliw, Dakbayan sa Sugbo human ang naandang labayanan niini sa Lungsod sa Consolacion ang temporaryong gisiradohan.

Si Mandaue City Vice Mayor Carlo Fortuna maoy mibutyag niini sa mga tigbalita diin matud niya nga nagsugod kagahapon, Mayo 8 ang ilang paglabay og mga basura sa maong landfill.

Asoy ni Fortuna nga human magkasabot ang mga residente sa lugar ug ang kagamhanan sa Siyudad sa Sugbo, gitugotan sab dayon silang makalabay sa dapit.

Ang bise mayor mao ang co-chair sa Solid Waste Management Board sa kagamhanan ug mipasabot kini nga sa ilang gikasabutan sa mga pamunoan sa ARN Builders nga magsugod na og labay sa mga basura kay magtipun-og unya kini atol sa kapistahan sa dakbayan nga gisaulog usab kagahapon.

Sa nasayran, gihunong sa Mandaue  City  government ang paglabay og basura ngadto sa  Consolacion human sa nahitabong pagdahili sa mga basura nga mitabon sa usa ka drayber sa garbage truck.

“The city will be paying ARN Builders P700 per ton of garbage that they will dispose, which is the same rate that the city used to pay to dispose at the landfill in Consolacion,” pamahayag ni Fortuna. (/DILT)(BANAT NEWS)