CEBU, Philippines – Ambulansiya sa Lungsod sa San Fernando gipaarakan sa wala mailhing tawo nga giingong sakay sa usa ka puting van diha sa Barangay Inuburan, Dakbayan sa Naga niadtong Lunes sa gabii.
Ang sakay sa maong ambulansiya mao ang drayber nga si Armand Navarro, 39, assistant driver nga si Harold Ballermo, 37, Janice Rosal, 35, pangulo sa Traffic Team, ug Rosalie Cajes, 37, nga kusinera ni Mayor Lakambini Reluya
Matud pa ni Staff Sergeant Dionisio Cabotaje, Desk Officer sa City of Naga Police Station gikan naghatud og pasyente sa Dakbayan sa Sugbo ang ambulansiya ug pabalik na sa dihang girakrakan sa wala mailhing mga mamumuno nga sakay sa usa ka puting van.
Ang ambulansya nilahos sa Baywalk sa Dakbayan sa Naga ug ang mga sakay nanaog sa kasilyas niini diin sila gitabang sa mga polis. Si Navarro naigo sa paa.
Si Felomino Leyson, Purok Federation President sa San Fernando, nitug-an nga ang maong ambulansiya anha ra gyud mag-estambayan sa balay sa mayor.
Gikompirmar ni Dr. Alfredo Manugas VI, Municipal Health Officer nga dunay pasyenteng gihatud sa siyudad ang ambulansiya. Sila si Navarro ug Ballermo mga casual nga empleyado.
Ang Election Officer sa Lungsod Mario Orville, nitug-an nga bisan pa sa nahitabo magpabilin ang kahigpit sa seguridad sa maong lungsod alang sa umaabot nga piniliay.
Si Police Regional Office 7 Regional Director Brigadier General Debold Sinas, nitug-an pinaagi sa phone interview nga nag teleconference na sila sa Provincial Director sa CPPO ug hepe sa Naga Police Station aron imbestigahan ang maong insidente.
Gimando usab niyang dugangan pa ang mga police checkpoints dili lamang sa mga highways kondili apilon sab ang mga dalan padulong sa kabukiran. (/IBM)(BANAT NEWS)