138 ka EBs idestino sa mga prisohan

CEBU, Philippines — Gipaubos sa seminar ang mga electoral board nga maoy mo-assist sa mga persons deprive of liberty nga mobotar sa mga prisohan karong umaabot nga May 13 midterm election.

Adunay138 gikan sa sobra 200 ka electoral board ang gi-seminar kagahapon diha sa Capitol Social Hall sa Commission on Election (Comelec).

Matud ni Atty. Jerome Brillantes, acting election supervisor sa Probinsiya sa Sugbo nga gitudloan ang mga EBs sa ilang himuon atol sa adlaw sa piniliay.

Matud usab ni Brillantes nga dili susama sa regular nga mga botante ang mga person deprived of liberty o mga piniriso tungod kay adto lang sila makabotar sulod sa prisohan.

Walay dad-on nga vote counting machines (VCM) diha sa mga jail facility.

Ang EBs nga i-assign sa mga prisohan maoy modala sa tanang balota nga gibotaran sa mga priso ngadto sa polling precincts diin ang mga inmate narehistro ug maoy mopakaon sa mga balota sa VCM.  Ang mamahimong botaran usab sa mga priso mao ang mga national candidates ug walay lokal nga kandidato.

Si Brillantes nagkanayon nga ang EBs dunay idestino nga polis nga mo-escort kanila sa pagdala sa mga balota padulong sa polling precincts.

Ang mga EB nga gi-assign sa mga prisohan sa Dakbayan sa Talisay, Dakbayan saToledo, Dakbayan sa Mandaue, Lungsod sa Medellin, Lungsod sa Minglanilla, Dakbayan sa Naga, Dakbayan sa Danao, Lungsod sa Bantayan, Dakbayan sa Carcar ug Cebu City 1st district maoy gipaubos sa seminar kagahapon.  Ang sunod nga hugna sa EBs i-seminar na usab ugma sa Comelec. (BANAT NEWS)