CEBU, Philippines – Makagawas na sa prisohan ang managsuong Arquillano sa isla sa Camotes human nga sila napriso og halos usa ka buwan human sila gidakop sa mga sakop sa Provincial Intelligence Branch niadtong Abril.
Ang mga Arquillano napriso kini sa Bureau of Jail Management and Penology (BJMP) sa Danao.
Si Mayor Aly Arquillano ug iyang igsoon nga si Vice Mayor Al, nakapiyansa kini ngadto sa korte og P750 mil sa mga kasong ilang giatubang nga kalapasan sa Republic Act 10591 o ang Illegal nga paghupot og armas ug kalapasan sa RA 9516 o ang illegal nga paghupot og eksplosibo.
Ang managsuon Arquillano giaresto human sa raid sa ilang panimalay sa lungsod sa San Francisco niadtong Abril 4 kun diin nakuha gikan sa ilang ancestral house sa Barangay Poblacion ang nagkadaiyang armas sama sa kalibre.22 rifle, AR-15 rifle, kalibre .45, pipila ka bala ug granada. Atol sa inquest niadtong Abril, ang mga Arquillano mipadayag nga ilang atubangon ang kaso sa korte inay tubagon ang alegasyon ngadto sa Prosecutor’s Office sa Danao.
Ang granada nga nakuha walay girekomendar nga bail samtang P175 mil usab ang bail sa mga armas nga nakuha.
Si retired judge Menrado Paredes kinsa maoy legal counsel sa mga Arquillano nagkanayon nga kagahapon, nipagawas ang korte og order nga mamahimo nang makagawas ang mga Arquillano.
“Non bailable ang grenade , pero based sa Constitution bisag ang offense non-bailable kung mo-file og petition for bail, mo-prove ang prosecution nga the evidence of guilt is strong,” matud ni Paredes.
Ang mga Arquillano parehong nilansar karong umaabot nga eleksyon. Si Aly pagka bise mayor samtang si Al nga maoy bise mayor karon sa lungsod maoy nidagan pagka mayor sa lungsod sa San Francisco. (/IBM)(BANAT NEWS)